【職場生存必備系列—拒絕的能力(上集)】#拒絕的能力
如果話一個人脾氣好，會聯想起忍耐、包容、退讓、唔怕蝕底嘅性格，相信大家都有呢類朋友或者同事。不過真心問句，佢哋職場上係咪發展順風順水？掉轉咁問，職場成功上到位嘅，係咪凡事退讓、永不say no嘅人？
只要細心觀察，職場上獲得成功，都係界線分明嘅人，一旦觸及佢哋底線，絕對企硬寸步不讓。好似以下三個case，大家遇到要學識反抗，唔好吞聲忍氣做好人，適當時候拒絕係必須㗎！
1)涉及核心利益：除非你大把錢打風流工，否則就要保護自己利益。當牽涉核心利益嘅時候，一旦作出讓步，隨時影響將來事業發展，無謂做好人作咁大犧牲吧。
2)被團體針對：發現自己俾團隊針對，甚至成為所有人嘅箭靶、出氣袋，你讓步會助長佢哋氣焰，自身利益亦會不斷受損。
3)被人利用：習慣用迎合方式同人相處嘅人，就算遇上蝕底事，都希望低調息事寧人。如果遇上心懷不軌同事，為達到目的利用你善良，迫食死貓同揹鑊，輕則影響名聲，重則惹上官司。
以上屬於職場欺凌級別，擺明恰到上心口，可以點拆？首先，改變自己「好人包袱」心態，忍一時未必風平浪靜㗎！如果仲為保持好人形象，表現太過寬容大方，對方只會得寸進尺，加速排擠同打擊自己！必要時，勇敢大膽say no，主動維護自己權益，等對方知道你係有底線！如果情況仲係無改善，自問又無其他解決辦法，就要尋求管理層插手，搵出問題精結所在，睇下係出於搬弄是非嘅同事，定抑或自己都有需要反省地方。
其實每個職場上嘅大好人，未必全部天生性格係咁，更大機會後天受灌輸觀念所影響。所以下一篇文，我會分享點樣避免墮入呢個糖衣陷阱！
Search